0
0
di Vittoria Minetti
A duvìa esse col ch’a fà quìndes ma, për maleur ël Covid, ste babòje ch’a
l’han cambiane la vita a tuti a l’han fàit dëscancelé për doi agn tante
amportante e bele manifestassion piemontèise.
Tutun as sà, nòsta rassa a l’é gorëgna e a l’ha torna aussà la testa. Bele che
ij tanti cacam spatarà an nòsta tèra a vado anans a dì ch’a l’é na lenga
mòrta, destinà a dësparì, nojàutri i la difenderoma con j’onge e con ij dent
fin ch’a-i sarà na përson-a bon-a a lesla e a scrivla.
Saba 20 ëd magg ël temp a giutava nen, a piuvìa a verse ma noste scòle
canavzan-e, cola ‘d Castlamont e cola ‘d Caluso, a son nen ësbaruvasse e,
pontuaj, me minca ann, a son presentasse a Coni për la premiasssion dël
concors ëd pròsa e poesìa an lenga piemontèisa ‘ntitolà a Renato Canini
organizà da l’associassion “Piemont dev vive”.
Renato Canini a l’é stàit ‘l prim pressident ëd l’associassion, a l’era un
fonsionari ‘d banca ma ‘dcò n’umorista che, an sà e an là ant l’Euròpa con
sò camper, a fasìa la cheuita ‘d faribolade e facessie che peui a passava an
piemontèis. A l’ha ‘dcò lassà n’archivi motoben ësgnor ëd conte e fàule.
Le presense ant ël salon d’onor ëd la Comun-a ‘d Coni, un salon da vëdde,
a càusa dël temp a j’ero nen tante coma sempe tutun ij nòsti anlev a l’han
fàit le spluve e a son portasse a ca ij primi tre premi për la pròsa.
A son ëstàit premià:
për la pròsa a tema lìber:
1° premi – M. Antonietta Valenza con:”Ël cit ëstagnin e la Madòna”
2° premi – Idelba Rossignoli con: “Ël dubi”
3° premi – Angela Bertolino con: “Ël canal ëd Caluso e soa ùltima
lavandera”
A l’é pròpi ‘l cas ëd dì che j’anlev a l’han bagnaje ‘l nas a la magistra che
con “Pioré o…grigné” a l’é meritasse na “Mension d’onor”.
A fene sté alégher a l’ha pensaie, come minca ann, ël professor Gioanin
Ceruti che, compagnà da soa fisa, a l’ha fane canté tuti.
Da apressié la bon-a volontà dël sìndich, Patrizia Manassero, che con un
pcit pass anans, a l’ha dane sò bin ëvnù an piemontèis…l’ann passà a l’era
nen ëstàita bon-a a felo.
Da lì i soma peui tramiasse a Caraj, ant ël ristorant “Il Quadrifoglio”
andova ch’a në spetava un disné da bërlichesse ij barbis.
+ There are no comments
Add yours