0
0
di Vittoria Minetti
Saba 7 d’otóber a Castlamont a l’é fasse la premiassion dël concors ëd pròsa e poesìa
piemontèisa “Ij Pignaté ‘d Castlamont” ch’a fà eut.
Na gròssa partecipassion ëd concorent ch’a l’han presentà pì ëd sessanta euvre tra
poesìe e conte a l’han trasformala ant na bon-a riussìa.
J’argoment a l’han spantià da la vita ‘d tuti ij di a j’arcòrd stërmà ant la memòria
dj’autor, ëd vòlte pien ëd gòj, ëd vòlte pien ëd magon. Për chi ch’a l’ha pì ‘d fantasìa
ël gieugh a l’é bel fé ma cost ann-sì, pròpi për deje la possibilità a tuti, a l’é
giontasse a la pròsa e a la poesìa na session ëd pì: cola ëd tradussion da l’italian al
piemontèis. L’ùnica còsa ch’as ciama al tradutor a l’é cola ‘d marché ‘l tìtol original
dël test e ‘l nòm dël prim autor. A saran valutà la grafìa e l’esposission.
Da neuv e mesa a la matin la gent a l’ha comensà a pijé pòst e, a des ore, ël Centro
Congressi Martinetti a furmiolava ‘d përson-e.
La Comun-a ‘d Castlamont a l’ha fàit cadò dij primi tre premi tant për ij poeta che për
ij narador con dij tòch ëd tèra rossa ‘d Castlamont modelà a man da la famija
Camerlo, ceramista da sempe. Le man ëd Jose a-j conòsso tuti, le pignate ‘d Jose a
l’han fàit ël gir dël mond e bele che adess a l’abia passaje ‘n pò la man a sò fieul
Corrado, la qualità e la blëssa a l’han nen arsentune.
As dis che “squadra ch’a vagna as cambia nen” e parèj a l’é stàit për la giurìa ch’a
dev giudiché j’euvre: con la pressidensa dël professor Sergi Maria Gilardin, Michel
dij Bonavé, Rosanna dij Tàper, Silvana Testore e Renso Luis Vàira a pòrto anans
oramai da eut agn sto badò. Ansi…a venta gavé Renso Luis Vàira, poeta e prosador
che, për ij primi tre agn dël concors a l’é stàit un concorent ch’a rabastava sempe tuti
ij prim, jë scond e fin-a ij tres premi. A sto ponto, l’organisassion a l’ha decidù ‘d feje
fé ‘l giùdes, për boneur chiel a l’ha acetà.
Minca euvra, poesìa ò conta ch’a sia, a dev esse presentà con un nòm ëd còmod an
manera che ij giùdes a conòsso nen l’autor. A sarà la soma dij vot ch’a stabiliss ij
premià.
Për la poesìa ël prim premi a l’é tocaje a:
Silvano Zecchin con “Përzoné ‘ndrinta al temp” ,
lë scond a Vittorio Gullino con “La potensa dla mùsica” e
ël ters a Maria Augusta Giovannini con “Rubel”.
Për la pròsa ël prim premi a l’é tocaje a:
Gabriele Gariglio con “Le nìvole dij seugn”,
lë scond a Annamaria Caffri con “Ël cafard” e
ël ters a Rita Turin con “Mè pare…n’alpin”.
Ij Pignaté a son na màniga d’amis nen tròp giovo ch’a cerco ‘d porté anans le
tradission e la coltura dël Piemont con na scòla ‘d lenga piemontèisa butà sù dël 2013
con l’agiut ëd la Conun-a e dl’assessor a la coltura d’anlora, Nella Falletti.
Për boneur, bele che doi agn apress a sia cambiaje l’aministrassion, la scòla a l’ha
podù andé anans l’istess con l’apògg dël sìndich Pasquale Mazza e dl’assessor a la
coltura Claudio Bethaz.
Bele ch’a l’abio nen vagnà, a tuti, pròpi a tuti ij present, ij Pignaté a l’han faje un pcit
cadò compagnà d’un papé ‘d partecipassion e un pachèt ‘d bëscotin fàit da dontrè
“pignatere”.
Ij Pignaté a son ëdcò ‘mprovisasse còristi con quatr canson robà a ‘n repertòri tut
piemontèis. A l’han cantà ò…stonà (?) tuti ‘nsema, compagnà da la fisa ‘d Michele
ch’a l’é sacrificasse për contenteje. Michele a l’é un fieul giovo ch’a la son-a nen
ma a carëssa soa fisa, a la popon-a e da coj tast a-j fà seurte ‘d son da fé vnì la pel
granà.
Present a la premiassion a j’era Andrea Cane, consié Regional ch’a l’ha fàit na
propòsta ëd lege për la tùa e la conservassion ëd la lenga piemontèisa e, ant la matinà,
sensa ch’a lo spetèisso, a l’é rivaie l’on. Giglio Vigna. A smija pròpi che tuti e doi a
l’abio a cheur la càusa dij piemontèis, cola ëd nen lassé meuire lenga, tradission e
coltura ‘d nòstra bela region. La proposta ‘d Cane a prevëdd ëdcò n’ora facoltativa ‘d
lenga piemontèisa a la sman-a ant la scòla, a sarìa bel e giust ma…a sarà dura.
Për finì an blëssa la giornà, a son tramudasse a Pranzalì con Michele, ël
fisarmonicista për gusté un disné da bërlichesse ij barbis ant la “Antica Trattoria dij
Ciapèj”, n’ambient familiar cudì da Cristina e soa famija.
Dontrè piat, na cantada e na sonada a l’é rivaie ses ore dël dòp mesdì.
Strach ma sodisfàit, minca un a l’ha pijà la stra ‘d ca soa.
+ There are no comments
Add yours