0
0
di Milian Giaco Racca
Ant le dariere sman-e la politica italian-a a l’ha fait registré dle novità motobin anteressante ch’a fan bin ëspëré.
Da na part la piataforma politica Drin Drin, ardità dl’esperiensa ‘d Fare per fermare il declino, un moviment civich ëd tendense liberaj, ch’a l’avìa ‘l federalism ant ël programa.Sa piataforma a l’è animà dzoratut da ‘d giovo debutant. Giovo,eficensa,federalism am ësmija na combinassion vajanta: la politica a dev arparti da ‘d giovo ch’a l’han l’energia, ch’a devo avej l’anvìa d’amparé a fé politica (an leu ‘d “butesse a pòst” ant ij vej partì). E ij giovo a duvrìo essi tuit dij federalista scaudà, përché federalism a l’è un sistema ‘d goern ch’a fonsion-a mej che j’àutri, ël pì bon a garantì eficensa e a possé la responsabilisassion, difati a l’è col tipich dle democrassie pì evolue e modern tant me la Svissëra o l’Alemagna.
Oltra al Drin Drin a l’è nà dcò ël PLD (partito liberal democratico), ch’a fa arferiment a l’economista, prof. Luigi Marattin.
A diferensa dij sòlit “cit busson” lideristich “sentrista”, ch’a son mach espression apunto d’un leader, e ch’a viso a fé la roa dë scòrta dla drita o dla manca ‘l PLD a l’ha l’ambission ëd creè un grup ëd debà ch’a discuta, ch’a veul fortì soe proposission an meud indipendent e echidistant da le doe bande populiste (la drita e la manca atoaj).
Dcò ël PLD a l’ha ‘nt ël programa la trasformassion dl’ëstat sentralista, vej e frust, ant na moderna federassion, a basta lesi ‘nt ël programa publicà sël sit.
D’altrond a me avis a venta prové a superé ‘l titol V , a venta gavé la tematica dël federalism a coj partì che për vaire ani a l’han campala ‘nt ël canton dël provinsialism e dël polentonism, e ch’a viso mach a àussé na bandierin-a propagandistica për mennì la cadrega.
Totun i l’hai dcò na riserva sla proposission federalista dël PLD: se da mira as parla ‘d dividi le competense ‘ntrà ij diferent livej ‘d podej ampaciand ëd sovraposission e contensios e sòn a va pro bin, da l’àutra as armanda a la division ministrativa dla sossietà geografica italian-a ch’a proponìa 31 o 36 cite region autonome. Ansìma a sòn i pens ch’a va bin l’eficensa, ma a venta fé atension a sganfé ‘d region, ëd topònim ch’a l’han n’istòria amportanta, e n’identità nassional.
Imagineve ampò scancelé d’amblé ‘l topònim Pedemontium, ch’a compariss dël 1075 ch’a l’è conossù an tut ël mond për sò vin avosà e soe spessifissità. Regione Grande Torino e Regione del Tanaro a van pì bin për ciamé n’ëstadi ‘d fotbal….o magara na piòla….
+ There are no comments
Add yours