La ciusa dle lessione dl’Unitre di Caluso
Tempo di lettura:2 Minuti, 2 Secondi
di Vittoria Minetti
Saba passà, ant ël parc “Spurgazzi” a Caluso, a l’é tenusse la ciusa dl’ann ëscolàstich
ëd l’Unitre ‘d Caluso.
Un pòst da vëdde, ant ël cheur ëd la sitadin-a, ancornizà da ‘d piante pressiose me
sequoie, magnòlie, camelie, platan e tij.
Për l’ocasion a l’é stàita alestìa na strutura andova a son dasse ‘l cambi j’anlev dij
vari cors.
A duverté ‘l dòp disnà ‘l pressident Massimo Ferrò. A roa, soa fomna Sara Magaton,
magistra ‘d “disegno artistico” che, con ij sò anlev a l’ha dëscurvì un panel ch’a
rapresentava Caluso an tute soe particolarità.
Ël laboratòri ëd “Musica insieme” a l’ha compagnà la manifestassion con tut
l’impegn dij sonador amprendiss.
Na sernia giusta a l’é stàita cola ‘d cobié ‘nsema ‘l cors ëd piemontèis con col ëd Baj
popolar, n’alternansa ‘mbinà tra un bal e na conta o na poesìa.
Na vantajin-a ‘d baj, minca un con la presentassion ëd Rosanna Vigliocco, pivò dël
cors, ch’a son partì da la Fransa për rivé, travërsand l’Euròpa e oltra fin-a a saré con
“La corenta” , bal tìpich dël Piemont.
Tra un bal e n’àutr j’anlev ëd piemontèis a l’han lesù un tòcha pr’un ëscrit ant ël temp
dël cors. A l’ha daje l’andi Angela Bertolino con “A scòla ‘d piemontèis”; Gabriella
Mocafico con soa “Boata”; a l’é peui tocaje a Lorenzo Grippiolo ch’a l’ha lesù un
tòch còmich ëd Mary Novaria; apress, l’amor për sò can a l’ha faje lese a Rita Turino
“Tòm…Tomin”; “Cit” a l’é na poesìa scrita da Rosella Vercellone che, për maleur a
l’ha nen podù esse presenta ma Gabriella Mocafico a l’é prëstasse për lesla; Luciana
Bagnasacco a l’ha lesù “Un bel viagi”, na descrission piasosa ‘d na vacansa an
Cameroun. A saré l’argoment a l’é tocaje a Vitòria Minèt con “Ël tesòr ëd Pinòta”, na
conta veja me ‘l tema ch’a trata: l’avarissia. J’argoment a l’han ambrassà ij temp ëd
l’infansia, l’amor për le bestie, ij viagi, tutun sensa dësmentié quèich pëssion ëd
comissità e ‘d moral.
A l’é stàit un rëscontr motoben ambinà, j’organiseur as mérito tanti compliment ma,
na cita crìtica a coj ch’as anteresso a gnente e as piasso an fond al salon sensa sté
ciuto gnanca për un moment dëstorband ël dësvilop dël programa, a venta féjla.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
