0
0
di Vittoria Minetti
Saba 19 d’otóber a Castlamont, ant ël “Centro Martinetti” a l’é tenusse la
premiassion dël concors ëd pròsa e poesìa piemontèisa “Ij Pignaté ‘d Castlamont
2024” ch’a fà IX.
L’overtura con l’inn “Piemont deve vive” ‘d Camillo Brero e le paròle ëd Claudio
Bethaz, assessor a la Coltura a l’han daje l’andi ai travaj.
Cost ann-sì j’organisator a l’han pijà la decision ëd deje ‘n premi special a Sergio
Donna, poeta e scritor tant avosà e bin bin conossù fin-a an Argentin-a.
Sergio a scriv pròse e poesìe, a pùblica ‘d lìber, la pì part ëd sò temp a lo dédica a
spantié la lenga e la literatura piemontèisa.
Minca ann a cudiss la publicassion dl’Armanach Piemontèis, na vera ciadeuvra fàita
sgnora con tuti ij Sant patron ëd le sità e dij pais, ël lunari, proverbi, poesìe, e tante
fòto. Ël 2024 a l’ha avù coma argoment le statue ‘d Turin con stòrie, ancontr e
legende. L’ann anans a son ëstàite protagoniste le fontan-e ‘d Turin e l’ann ch’a-i ven
a saran ij pont ëd Turin. Minca argoment a l’ha dobia version: italian-a e piemontèisa.
Për torné a la premiassion: an concors a son ëstàite presentà 24 poesìe e 24 pròse
giudicà da na giurìa compòsta da Rosanna Tappero, Michele Bonavero, Luigi
Lorenzo Vaira, Silvana Testore e Clara Nervi. Pressident ëd giurìa ël professor Sergio
Gilardino che, për maleur st’ann-sì a l’ha nen podù esse present për motiv ëd salute
ma un dij Pignaté, Gianluca D’Orazio, a l’ha lesù un pcit tòch ëscrit dal professor
ch’a spiega, sensa tante paròle, l’importansa dle lenghe minoritarie.
La matinà a l’é peui dësvilupasse con mùsica e canson piemontèise, faribolade cudìe
e butà ‘n sena da na part dij Pignaté ch’a son anventasse fin-a ator e cantant.
A soporteje e a compagneje con la mùsica a-i era torna Michele Urietti, un
fisarmonicista giovo e ‘n piòta ch’a l’ha la passiensa d’un sant.
La premiassion a l’é peui andàita anans con un pcit cadò për tuti ij partessipant
present bele ch’a fusso ant ùltime posission.
A dovrìa dventé na costuma për ij partessipant cola ‘d presentesse a la premiassion
bele ch’as conòssa ‘ncora nen la classìfica ‘dcò përchè nòstr concors a l’é lìber a tuti
sensa òbligh ‘d vërsé ‘n cotis a l’iscrission.
Ël prim premi dla poesìa a l’é tocaje a Maria Augusta Giovannini, na poetëssa
d’Ivrèja con “Vent ëd Comba”. Lë scond a Maria Teresa Cantamessa Andrina, un
nòm che da agn a ten sò pòst ant le classìfiche tant ëd poesìa coma ‘d pròsa. Ëdcò
chila d’Ivrèja con “Cel Piemontèis”. Ël ters a Gabriele Gariglio con “Meira Ciafre”.
Për la pròsa a l’é stàita Annamaria Caffri ‘d Castlamont a pijé ‘l prim premi con
“Sensa pare” ch’a conta ij sentiment d’un fieul che, passà na vita sensa un pare, a
s’avzin-a mach un moment prima ch’a meuira. Le scond a l’é ‘ndaje a Idelba
Rossignoli con “Na vita ant un pensé”, un pensé ch’a arpassa soa vita ‘ndaré
antramentre ch’a cudiss soa mare madòna ant j’ùltim moment ëd vita. L’àutr
ëscond, pari mérit, torna a Gabriele Gariglio con “La balada ‘d Sant Isidòr”, na conta
‘d tradission ëstòrica. Ël ters premi ëd pròsa a l’é tocaje a Rita Turino ëd Caluso con
na conta motoben grignòira: “J’aventure ‘d Gustin e Pina, doi ansianòt ch’a van a
trové ‘l fieul a Londra e a monto s’un rioplan për la prima vira.
A rova, ma pròpi a rova, për la pròsa, Luciano Milanese con “A-j disìo Irene”, peui
Franco Antonel con “La curiosità për le lenghe foravìa”, Rosanna Vigliocco ‘d
Caluso con “Quatr anej” e Angela Bertolino ‘d Baron con “Doe fijëtte”.
Për la poesìa Carlo Brosio con “La veciaja”, Franco Tomasi Cont con “Pitòcio”, torna
Luciano Milanese con “Lusariòle”, Lorenzo Giraudo ‘d Coni con “Un parco ‘d
campagna”, Silvana Sapino con “Schers ëd pais”, Anna Boassone con “Na bruta
aventura finìa bin”, Adriano Cavallo con “Luis a l’ha fala gròssa”, Maria Bosio con
“La spèisa dël saba”. Turun a sarìa mal fé a nominé tuti j’autor.
Ij primi tre premi, euvre ‘d ceràmica dël ceramista Perino a son ëstàite oferte da la
Comun-a ‘d Castlamont peui na bela mostra ‘n ceràmica piturà e doi piat sempe ‘n
ceràmica piturà realisà e ofert da Enida Cavallo e Annamaria Caffri.
Ël muliné ‘d Piova, Giorgio Pagliero, come minca agn, a l’ha fàit cadò ‘d dódes
pachèt ëd farin-a da polenta ‘d sò mulin. L’asienda Wiler, oramai da ani, a furniss ‘d
bele borse ëd cartlon decorà për la confession dij premi. Ël ristorant “Ij Ciapèj” ëd
Pranzalì a l’ha fàit cadò d’un bon për un disné o na sin-a për doe përson-e.
Un gròss mersì a tuti sti “sponsor” (bele ch’a sia nen piemontèis) da part dij Pignaté.
La matinà a l’é sarasse con na sonada ‘d Michele Urietti për andé peui anans con un
disné da bërlichesse ij barbis al ristorant “Ij Ciapej” e ‘n dòp mesdì an alegrìa con
mùsica e canson.
A venta dì che tut sòn a peul mach esse realisà mersì a la disponibilità dla Comun-a,
ch’a lassa utilisé la sala për fé scòla na vòlta a la sman-a. Mersì al sìndich, a
l’assessor e a l’uffissi coltura.
+ There are no comments
Add yours