0
0
di Vittoria Minetti
Ant ël dòp mesdì ‘d dumìnica 12 ëd gené, ant ël salon “Falconieri” a San Giòrs, . a
j’era pì nen a basta ‘d cadreghe për fé seté tuti. Minca ann la bravura e la fantasìa
dj’autor a fan chërse l’afluensa ‘d përson-e ch’a veul assiste a lë spetàcol.
Le mùsiche da film e la vos strasordinaria d’Elena Datta, ëdcò pressident ëd la
filarmònica, a son ëstàite le protagoniste.
Arialdo Milano, già pressident ëstòrich (ma nen vej) a l’ha duvertà ‘l dòp mesdì con
soa simpàtica capacità d’intratenitor. Chiel e ’l magìster ëd mùsica Ivan Pagnone, a
l’han fàit finta d’esse un pùblich ch’a spetava l’inissi dlë spetàcol.
A Daniela Graglia, definisse da sola “mila mësté”, a l’é tocaje ‘l travaj dë scrive ‘l
test: “Che film ci ascoltiamo stasera?”.
Daniela, oltra a esse musicanta da vàire agn e scritris, a l’é ‘dcò ‘mprovisasse atris,
condutris e fin-a balarin-a.
Ël prim posson a lë spetàcol a l’ha dàjlo un defilé ‘d balarin-e vere, cheicun-a
amprovisà, an costum ch’a rapresentavo ij ròlo dj’ator e ij tema dle projession.
Le balarin-e “vere” a fan part ëd la scòla ‘d bal A.S.D. di Gabriella Deidda che, ormai
da vàire agn, a compagna con ël bal la mùsica dël consert..
A fé pì sgnor ël dòp mesdì a l’ha contribuì, con na presensa numerosa, ël grup ëd San
Balègn “General Vincent Marching Band” ch’a l’é esibisse prima da sol con ij sò
musicant për unisse peui a la filarmònica “Carlo Botta” e porté anans, tuti ‘nsema, un
consert da fé stravëdde e…strasente.
Con un batiman fogos a l’é intraie ‘n sena’l magìster ëd mùsica, Ivan Pagnone. La
mùsica a l’é chiel, a smija ch’a viva ‘d mùsica…ch’a respira mùsica. L’elegansa e le
formalità a son nen sò fòrt, an efet, sensa muda nèira da blagheur ma con un pàira ‘d
jeans, le scarpe da ginàstica e la camisa…na frisa s-ciassa, a riess a fé vive, con la
colaborassion dij sò musicant, emossion ancreuse e ‘nciarmante.
Tant për rispeté le pianà da banda, a son partì con “Fly Past” na marcia ch’a l’ha fàit
scaudé ‘l pùblich con un batiman a son ëd mùsica. A segue: “Il Padrino”, “Eye of the
tiger”, “Valzer del Gattopardo”, “Da Vinci Code”.
L’antërmes tra la prima e la sconda part a l’ha vist Daniela Graglia e Michela Barbero
ant ij ròlo ‘d doe fomne ant na banchin-a ch’a arvivìo ‘d frasi gavà dai cine ‘n
question.
Arialdo, sta vòlta ator, a ‘nterogava ‘l pùblich për feje andviné ël tìtol. Na manera
simpàtica për impliché ’dcò le përson-e che, a venta dì, a j’ero bastansa preparà.
A sto ponto a l’ha pijà l’andi la sconda part dël consert, cola ch’a l’ha portalo a la fin
con dj’àutri quatr tòch: “Over The Rainbow”, “I will always love you”, “La
sirenetta”, “Pirati dei Caraibi”.
Na pcita pàusa për ringrassié sìndich, organisator, pressident, madrin-a e musicant
con quèich mass ‘d fior e… për finì l’ùltima sonada: “Blus Brothers”.
Ël bis a l’é stàit, come tuti j’agn, d’òbligh e “Pirati dei Caraibi” a l’ha sarà ‘l dòp
mesdì musical.
+ There are no comments
Add yours