1
0
di Vittoria Minetti
Bele ch’a l’abio vorsù deje na gravura còmica, a l’é stàit në spetàcol motoben ësgnor
ëd bon-a mùsica, përchè ij musicant cost ann-sì a l’han vorsù strafé.
Ël magìster ëd mùsica, Ivan Pagnone, a l’ha fàit finta ‘d feje ‘ncora fé na preuva
prima ch’as vestèisso parèj a son rivà an sena chi ‘n vestalia, chi con na vesta da bagn
o an savate o con la testa ‘nvërtojà ant un suvaman e, ciadlà an costa manera, a l’han
sonà ël prim tòch scaudand ël pùblich peui, antramentre che ij presentator a
comensavo sò travaj lor a son tornà ant ij cambrin a butesse a l’onor dël mond.
A l’é mal fé a trové un pivò an mes a sta bela combrìcola përchè tuti ‘nsema a
strasudo amicissia e union dal pì giovo al pì vej.
A l’han batiala “La Sanremotta” ch’a pudìa smijé a na sumiarìa dël festival ma ch’a
l’ha daje tanti pont al festival dël di d’ancheuj.Tant coma ‘nt un festival ver, a-i era
doi presentator, Filippo Arri e Antonella Colletti ch’a l’han daje l’andi a la
manifestassion con la ven-a còmica mantnùa fin-a a la fin.
Bianch ross e verd, ij color ‘d nòstr drapò (bandiera), tre veste a l’autëssa dla
situassion adòss a Michi (Michela Barbero),Sere (Serenella Valazza) e Dany
(Daniela Graglia) ch’a l’han fàit finta d’avèj ‘n moment d’ambarass për trovéje ‘l
pòst giust ai tre color antramentre che Arialdo Milano ch’a smijava neuv con giaca
sbërlucanta e farfalin, a spetava ch’as decidèisso a butesse ‘n quàder për comensé.
Fabrizio Guietti, n’Achille Lauro un pò dròlo sensa tatuagi e sensa camisa trasparenta
e Federico Milano con na caviera celest ch’a l’ha arvestì ‘d pì che bin ël ròlo ‘d
Loredana Berté. Na manera simpàtica ‘d butesse ‘n gieugh che ‘l pùblich a l’ha
motoben apressià…magara fin-a ‘d pì che s’a fussa rivaje coj ver.
Coma ch’a l’ha dit Daniela Graglia, la “mila mësté” coma ch’a la definiss soa mare
e autris ëd tut l’ambaradan: “Na còsa a l’é butela s’un feuj ëd carta ma n’àutra a l’é
butela an pràtica”. A venta dì che tuti, pròpi tuti a son dasse un gran da fé a parte dal
magìster ëd mùsica, ch’a l’é arvestisse da ator ansema a tuti j’àutri e për l’ocasion a
l’ha avù doi ròlo: na vòlta d’Ivan Pagnone e na vòlta ‘d Pagnone Ivan. Chiel, i penso
d’avèjlo già scrit, i chërdo ch’a viva ‘d mùsica, a la mangia, a la respira, la mùsica a
l’é ‘ndrinta a chiel, a l’ha nen manca nì ‘d muda con le coe nì ‘d farfalin, nì ‘d
bachëtta, a basto soe man e soa passion për tiré fòra da soa orchestra j’arie pì
‘nciarmante.
Për comensé a l’han fàit da padron le canson dj’agn sessanta smonùe al pùblich da
giovo e meno giovo ch’a val la pen-a ‘d nomineje: Noa Saccotelli, Giulia Comoglio,
Claudio Defilippi e Paolo Contratto, sensa dësmentié Elena Datta che, oltra a esse
pressident ëd la “Carlo Botta” a l’ha na vos ch’a farìa tërmolé ij lampadari…s’a-j
fusso. Tuti masnà ‘d jer e l’àutr jer, për mi ch’i scrivo: i j’arcordava s’na carossin-a e
i l’hai artrovaje grand con ëd vos da fé vnì ij frisson travers ël filon ëd la schin-a.
A l’é stàit për tut ël dòp mesdì un turbij d’argoment e ‘d mùsica.
Na ciaciarada scasi familiar ch’a vorìa imité n’antërvista a Daniela Manganelli,
pressident ëd la pro-loco e a Marco Baudino, ël sìndich. Doi termo bin piantà për San
Giòrs ch’a pògio ‘l sëddes (përdon për la “licenza poetica”) dzora a doe cadreghe
sensa cussin e mal fé da tenje fërme ma ij risultà tant ëd l’un-a me dl’àutr a parlo da
soj.
Për nen ciamelo “ël pì vej” disoma “ël pì veterano” dla Carlo Botta: Sergio Poreta
(Sergio Defilippi) a l’ha arcòrdà ‘nsema a Pajòt (Gianfranco Paglia) e a Arialdo col
lontan dop mesdì che lor doi, pòch pì che masnà, a j’ero vnùit a ciameje, pròpi a
chiel, coma ch’a l’avrìo podù fé për intré ant la banda. A son ancora lì! Enrico
Cagninei a fà part dël grup dij pì ansian e a l’é smijame ‘d sente un vel dë schergna
bonaria sla soa pontualità përchè a diso che la frase ricorenta ant le pròve a l’é: “A l’é
rivaje Enrico, i podoma comensé”.
Për Arialdo, dal moment ch’i lo conòsso bin, i spendo quàich paròla ‘d pì: s’a-i fussa
nen a vantrìa ‘nventelo, eclétich, positiv, modest e sempe a disposission. As peul
definì pròpi na bela përson-a. La Carlo Botta a l’ha avulo come pressident për pì ‘d
vintesingh agn; ansema al prof. Mario Cuffia dël 2003 a l’ha dàit na gròssa man a
buté sù la companìa ‘d teatro dialetal “Ij Trensema”; minca ann a prepara ‘l babacio
për ël carlevé; a cudiss l’associassion ëd San Ròch; a fà parte ij balon an minca festa
dij canton e, chiel e Germana, soa fomna, a fan ij nòno dij sò tre anvod.
Le balarin-e dla “Danzando A.S.D. scuola di danza” direta da Gabriella Deidda a
manco mai për compagné con pass ëd bal e stiribàcole a temp ëd mùsica ij tòch sonà
da l’orchestra.
A conclude la manifestassion ch’a sarìa mej ciamé “festa”, ij ringrassiament da part
d’Elena Datta a la madrin-a Laura Corio, quàich bochèt ëd fior e tanti, tanti batiman.
Un pontel da nen perde che minca ann a ‘rciama un pùblich sempe pì numeros tant a
l’é che, për avèj un bon pòst, a venta rivé almanch tre quart d’ora prima ch’a comensa
lë spetàcol.
+ There are no comments
Add yours