di Vittoria Minetti
Anans ëd tut a venta dije ‘n pì che gròss mersì a Renzo Grippiolo che, an coste
ocasion a l’é sempe ‘l pivò ‘t tut. A-i é gnanca ‘l temp ‘d tiré fòra na cita pensada che
‘d bòt an blan chiel a organisa tut, sensa ciameje gnente a gnun a treuva ‘l pòst, la
data, ij përsonagi e via fòrt. Renzino, coma ch’i lo ciamoma nojàutri ‘n confidensa, a
fà part ëd cole përson-e che s’a-i fusso nen a ventrìa ‘nventeje.
La Comun-a ‘d Vische, ij pensionà, j’ansian e l’Unitre ‘d Caluso con la man fòrta ‘d
Lorenzo Grippiolo, ant ël salon “polifunzionale” ëd via Massè a son butasse ‘nsema
për organizé dumìnica, prim ëd fërvé, un “Dop Mesdì Piemontèis” (Pomeriggio
Piemontese).
Ij tanti argoment bin sernù, amusant e ‘nteressant a son ëstàit portà anans da:
- Ij Cantèir ëd Pont Canavèis con:
- fàule, legende, canson e baj dla val ëd l’Eva d’Òr e val Soan-a
- Sergio Donna, poeta e scritor piemontèis con:
- Storia dij piemontèis an Argentin-a
- Cafè e locaj ëstòrich ëd Turin
- Armanach Piemontèis dël 2026
- Vitòria Minèt, magistra ‘d lenga piemontèisa:
A l’ha curà le tradussion sij café e locaj ëstòrich ëd l’Armanach piemontèis:
Ij Cantèir ëd Pont con soa alegrìa a l’han tirà ‘n mes al bal part dël pùblich: ij pì
coragios dij Bambas ëd Caluso ch’a j’ero numeros, a l’é vistse la diretris dij cors ëd
l’Unitre ‘d Caluso giravolté (as fà tant për dì) an mes a balarin vajant e na maja bleu
(un-a sola për maleur) dij Pignaté ëd Castlamont.
Cost ann ëscolàstich a Caluso a l’é partì con na presensa neuva, Vitòrio ch’a l’ha
stupì tuti con soa bravura e fantasìa: a l’ha passà e adatà ‘n piemontèis Hallelujah ëd
Leonard Cohen dël 1984 e “Imàgina” ëd John Lennon dël 1971 che, për l’ocasion a
l’ha fin-a cantala.
A venta dì che sta vòlta Ij Pignaté a l’han mancà ‘l pontel, a conteje tuti, as dovrava
mach na man sola (i j’ero an tra singh comprèis Francesco ch’a fà ‘dcò part dij
Cantèir).
Doe ore passà tròp an pressa, rëscontr ch’a vantrìa fé pì sovens sempe con la speransa
ëd nen lassé meuire la lenga piemontèisa.
Lorenzino, date da fé!
+ There are no comments
Add yours