0
0
di Vittoria Minetti
A-i é ‘d moment che ‘l moral a l’é an ribass, ch’a smija che cudì ël piemontèis, nòsta lenga, a sia un travaj inùtil ma peui cand ch’as vëdd, coma ch’a l’é stàit saba 15
d’avril, ant un moment ampinisse ‘l salon ëd gent anteressà a tut lòn che ‘l programa
a vorìa argalé, a së slarga ‘l cheur e as va anans a testa bassa tant me na slòira.
La Giornà Piemontèisa” a l’ha organizala l’UNITRE ‘d Caluso con la curnis ëd
“l’Unitre Itinerante Sud Est Canavese” con ël patrossini dle Comun-e ‘d Baron e
Caluso e l’agiut ëd la Pro-Loco ‘d Baron.
Për primi a l’han pijà ‘l mass ël sìndich ëd Baron, Alessio Bertinato, peui Massimo
Ferrò, pressident ëd l’Unitre. Tant un come l’àutr con pòche paròle a l’han dit tut lòn
ch’a j’era da dì e daje l’andi a la festa.
Ël magìster ëd cant, Davide Motta Fré, corista dël Teatro Regio ‘d Turin e diretor dël
Farfacoro d’Òr Canavèis, anans a l’ha trassà na pcita stòria dla canson piemontèisa
peui a l’ha fàit argiojì la platea con vàire tòch ëd Gipo Farassino antërpretà con vera
magistrëssa.
A rova a l’é rivaje sël palch quàich ator ch’a fan part ëd la Companìa “Ij Trensema”
për buté an sena na farsa titolà “Doe pacolin-e a Turin”. Un viagi un pò tribulà ‘d
doe paisanòte, na mare e soa fija che, an sità, a ‘ncontro vàire antrap, prima con
l’adrëssa da trové peui fin-a con na madama blagheura e sò can. A l’é pròpi a càusa
dël can che la mare pacolin-a e la madama a rivo scasi a le man. Na situassion tuta da
grigné.
La sena a l’é peui stàita robà dai Balastòrie, ch’a l’han portà ‘n pista mùsica e baj
tradissionaj piemontèis. Un grop con ëd costum antich da lassé ‘mbajà che, na vòlta
finìa soa esibission, a l’ha implicà ‘l pùblich mostandje ij primi pass dij baj.
L’amusament a l’é stàit garantì e gradì.
La situassion a l’é dventà un pòch pì seria con “Tra stòria e modernità” dël dotor
Giorgio Gnavi che, partì da le rèis pì ancreuse dla coltivassion ëd la vis “erbaluce” ‘d
soa famija e dël teritòri, a l’ha travërsà tut ël Canavèis arciamand la costrussione ëd
la ciadeuvra dla bialera (Canale di Caluso) ch’a part da l’Eva d’Òr dë Spinèj, a scor
për vinteut chilòmetri traversand vàire pais e a finiss sò viagi a Massé andova ch’as
campa andrinta a la Deura.
Clara Nervi con soa ciancia a riess a dì le còse serie con na simpatìa ch’a spantia
daspërtut atorn a chila. A riva da Loasseul, un pontin sla carta geogràfica an provinsa
d’Ast. Clara a con pòche paròle ciàire a l’ha dàit ëspiegassion ëd lòn che, slë fond
daré ëd chila, a tronegiava: ël “Gran Drapò dël Piemont”, bandiera stòrica ‘d nòsta
region che, minca ann, as mérita na giornà ‘d festa ant na comun-a ch’a-j dà ospitalità
për col ann-lì. Se le còse a van coma ch’a devo ‘ndé, ël 2023 Caluso a l’avrà
l’impegn e l’onor. Ël Gran Final dij Balastòrie a l’han fàit passé col pòch temp ch’a
dividìa da la marenda sinòira, bon-a e bin organizà da la pro-loco ëd Baron.
A l’é d’òbligh un gròss mersì për l’impegn tant a Massimo Ferrò e al sìndich Alessio
Bertinato ma…sensa dësmentié le doe ànime dël travaj, cole ch’a l’han travajà për da
bon: Lorenzino Grippiolo e Roberto Tirapelle.
+ There are no comments
Add yours