0
0
di Vittoria Minetti
L’aluvion dël mèis passà an Emilia Romagna a l’ha lassà na blëssura përfonda ant ël
cheur ëd minca italian, pensand peui ch’a l’é fin-a staie djë siacaj che, profitand ëd le
dësgrassie ‘d cola pòvra gent a l’han avù ‘l topé d’andé a fé ravagi an cole ca devastà
da l’eva e dal paciòch, as sent un frisson travers ël fil ëd la schin-a. Nopà, tanti
volontari rivà da minca part ëd la nassion e nen mach, con pich, pala e ramassa a son
dasse da fé për giuté an tute le manere ch’a l’han podù. Pròpi an costi di che la
crònaca an pòrta ‘n prima pàgina le figure ‘d coj giovo che, con na vitura ch’a l’é
‘ncora nen capisse s’a podèisso portela o nen, a l’han causà la mòrt d’un masnà ‘d
singh agn, a ven istintiv ël confront con j’àutri giovo coj ch’a son ësvërciasse le
manie e a son andàit a spalé ‘d paciòch ant ij pòst anlagà.
Fin-a “Ij Trensema” për lòn ch’a son bon a fé, a l’han butà ‘n sena soa comedia e lòn
ch’a l’han pijà a l’é andàit tut a benefissi ‘d cola popolassion.
Dumìnica 17 ëd giugn la comedia “Chi ch’a la veul cheuita…chi ch’a la veul
cruva” a l’ha ampinì ‘l salon pluriuso ‘d San Martin Canavèis e, mersì a la
generosità dël pùblich, a son rivà a cheuje ‘d pì che mila euro. Na gran-a ‘d sabia ant
un monton ma…tut a fà.
Andé a recité a San Martin a smija d’andé a trové dij car amis, ël sìndich (am pias
nen dì “sìndaca”) Silvana Rizzato con ij sò colaborator e con l’agiut ëd San Gioann,
a la fin ëd lë spetàcol a l’ha fane trové dij pitansin da bërlichesse ij barbis.
Për la companìa a l’é stàit un pontel piasos e i voroma chërde ch’a lo sia stàit ëdcò
për ël pùblich e j’aministrator.
+ There are no comments
Add yours