0
0
di Vittoria Minetti
Vënner, 19 d’avril – 1ª part
Mach na ment vërsàtil coma cola d’Ennio Pedrini, editor, a pudìa tiré fòra na pensada
parèj. Tre di, un dapress a l’àutr, strapien ël cultura piemontèisa, part an lenga e part
an italian ch’a son tenusse a Lessol, al “Nassional” na costrussion dël 1902.
A duverté ij travaj j’inmanchévoj salut istitussionaj con la presensa d’Alessandro
Giglio Vigna, deputà dla Repùblica Italian-a ch’a l’ha presentà un proget ëd lege për
valorisé e fé arconòsse ‘l piemontèis come lenga minoritaria. Ël piemontèis a l’ha tut
lòn ch’a-j va për esse arconossù coma lenga. Is auguroma ch’a sia la vòlta bon-a.
A son nen tanti ij piemontèis ch’a san còsa ch’a l’é “Ël Drapò”, bandiera stòrica dël
Piemont dont pròpi an costi ùltimi temp la Region a l’ha fàit seurte un lìber: Ël
Drapò, Storie e curiosità intorno alla bandiera del Piemonte” a l’é ‘l tìtol dël lìber scrit
da lë stòrich Michele D’Andrea e da n’espert ëd drapò Enrico Ricchiardi .
Con un gròss batiman ‘l pùblich a l’ha arseivù ël “Gran Drapò” ch’a l’é stàit dëstendù
e portà ‘n cortegi për tuta la sala dal grup dij Pignaté ‘d Castlamont, dai rapresentant
dël Circolo Culturale Langa Astigiana e da Andrea Cane, consié regional.
Dël 1968, mersì a la Badìa del Gran Drapò ‘d Seto, minca ann as ten na gran festa
sempe ant na Comun-a diversa për feje onor a nòstr sìmbol. A l’é në stendal ëd tre
méter për doi e minca Comun-a a lassa sò nòm ricamà con la data dla festa. A giugn
dël 2024 ël Gran Drapò a farà tapa a Riva ‘d Cher e sò nòm a sarà ‘l prim ëdzora al
ters ëstendal. Për maleur a l’é stàit ferm për tre agn a càusa ‘d cola bruta porcherìa
mondial e, ant l’ùltim pòst ëd lë scond, as peul lese “Covid”.
A sto ponto a l’ha pijà la paròla ‘l consié regional Andrea Cane con la conferensa
“Valorizzazione e promozione, da parte della Regione Piemonte, del patrimonio
linguistico e dialettale”
A l’é peui tocaje a la scòla ‘d piemontèis “Ij Pignaté ‘d Castlamont” ma, për maleur,
ël temp a l’era restà pòch e, apress a pòche paròle ‘d presentassion, quatr anleve a
l’han podù lese quàich s-cianchèt ‘d conta e na poesìa.
Për l’argoment “Libri e giornali in piemontese” a l’han pijà la paròla Massimo Iaretti,
fondator ëd Canavesanoedintorni.it e Michele Bonavero, cap redator ëd Piemontèis
Ancheuj, na publicassion ësgnora ‘d color, tuta an lenga piemontèisa.
A l’ha sarà ‘l dòp-mesdì Davide Motto con “Antologia – Le vie dei Poeti Passeggiate
in Canavese di poeta in poeta”.
Apress a n’apericena a l’é rivasse a la conferensa magistral dël professor Vigliermo:
“Testimonianze di vita nel Canavese del canto narrativo rivelato da Costantino
Nigra”. Conferensa spassià da tòch motoben piasos dël còro Bajolese.
+ There are no comments
Add yours