0
0
di Vittoria Minetti
A l’é giumai passaje dj’agn da cand ch’i soma trovasse a Bërnes, a ca ‘d Candida e
Piercarlo, për deje vita a “J’Amis dël Grand Drapò”. Na companìa nassùa për
compagné e cudì ‘l sìmbol ëd nòstr Piemont an tute le tape ch’a cambio minca ann.
Da Pianëssa a Caràj, da Caràj a Castlamont, Ceresòle, Noasca, Narzòle…sensa conté
cole ch’a van anans dal 1968 cand che, mersì a Ceco Besson con soa “Badìa dël Gran
Drapò” a l’ha daje l’andi a la prima festa dël Piemont…peui, për maleur, col
maléfich contagg dël 2021 a l’ha fermà minca inissiativa e, ëd conseguensa, ëdcò soa
marcia.
Tutun, bele con j’elession an mes, mersì al professor Domenico Torta, al sìndich pen-
a elegiù e a Walter Bergesio, n’òm con la miola piemontèisa, ël Gran Drapò a l’ha
podù fërmesse a Riva ‘d Cher për comensé soa prima presensa ‘mportanta ant la
festa ëd Sant’Alban. Për tut l’ann ch’a sarà soagnà dai rivèis, a sarà present a minca
festa dël pais dont sò nòm a arsàuta a j’euj con “Riva ‘d Cher 2024”, al prim pòst sël
Drapò neuv, col ch’a fà tre, confessionà ant la sede dla “Langa Astigiana” ‘d
Loasseul con un pcit agiut dij Pignaté ‘d Castlamont.
Cola ‘d Riva a l’é stàita na bela festa…na gròssa bela festa, dedicà al Piemont, a soa
coltura e a soe tradission.
La manifestassion a l’é stàita condìa con la presensa ‘d përsonagi amportant me
Gianfranco Gribaudo ch’a l’ha parlà dij dissionari piemontèis ma, con soa modestia a
l’ha daje pòca amportansa a sò “Ël neuv Gribàud – dissionari piemontèis”. A l’é dal
1972, con soa prima edission, ch’a giuta ij piemontèis ch’a veulo amprende a scrive.
Apress a costa cola del 1983 e cola dël 1996. As mórmora ch’a-i na sia n’àutra, cola
ch’a farìa quatr…
A l’é sentusse la mancansa dël professor Sergi Gilardin ch’a duvìa ten-e na
conferensa sij 600 agn dël Drapò Piemontèis ma, për maleur, soa salute a l’ha pa
përmettujlo e a l’é tocaje a Walter Bergesio lese lòn che ‘l professor a l’avìa passaje.
Ël professor Domenico Torta a l’é stàit bon a ‘ncanté ël pùblich con la mùsica ch’a
l’ha chiel andrinta a l’é bon a ‘ngagé j’àutri con vivacità e amusament.
Na banda musical ben ben ësgnora a l’ha compagnà ‘l cortegi dal Palas Gròss, sede
dla Comun-a, atorn al centro stòrich con ël Gran Drapò distèis portà an bela mostra
da j’amis dël Gran Drapò e dai Pignaté ‘d Castlamont fin-a al moment ëd “L’alza
bandiera” sla faciada ‘d Palas Gròss (sede dla Comun-a e dël “Museo del Paesaggio
Sonoro”) sle nòte dj’imn Euròpengh, Nassional e Piemont dev vive.
Un consert da la tor ëd le ciòche (sec. XII): Baudëtta, a l’ha spantià an tuta la piassa
le nòte ‘d melodìe veje piemontèise.
Apress a ‘n bon disné, con un còro ‘mprovisà compagnà da na fisa, i l’oma cantà
tuti…an piemontèis, a-i é gnanca manca ‘d dilo. E, sempe ‘n piemontèis, doi
simpàtich giròni a l’han contà dontrè faribolade grignante.
Ant ël prim dòp mesdì, a l’é valùa la pen-a visité ël “Museo del Paesaggio Sonoro” e
assiste a la projession dla pelìcola “I Santi Contadini” torna curà da Domenico Torta.
Vers singh ore Giove Pluvio a l’ha vorsù fé sente soa presensa e ij musicant ch’a
j’ero già pront për comensé sò consert, a l’han dovù coaté tuti jë strument e butesse a
sostra.
Ël boneur a l’ha vorsù che la pieuva a durèissa pòch e “Ij Rivaival” a l’han podù
spantié l’alegrìa an tuta la piassa con soa mùsica.
Apress a na marenda sinòira la cesa a l’é ‘mpinisse për sente la Mëssa an piemontèis
celebrà da dòn Domenico Catti. Sla fin a l’é intraie la Filarmònica sle nòte dla
“Leggenda di Sant’Albano”.
Na giornà tant piasosa ch’a l’avrìa ‘ncora podù andé anans për quèich ora con baj e
feu artifissiaj ma le doe ore ch’a në spetavo për torné an Canavèis a l’han fane saluté
con un pò dë stracheur la combrìcola.
+ There are no comments
Add yours