Ij Trensema a Cotress/Cortereggio (articolo in lingua piemontese)

Tempo di lettura:2 Minuti, 32 Secondi

di Vittoria Minetti
La càud ch’a fasìa jer, 9 ëd luj, a l’ha nen spaventà ij Trensema ch’a l’han butà ‘n
sena a Cotress (Cortereggio) sò ùltim travaj: “Chi ch’a la veul cheuita…chi ch’a la
veul cruva!”
Cotress a l’é na frassion ëd San Giòrs bele ch’a sia pì davzin a Lusiè (Lusigliè) e al
Zèrb (San Giusto). Marina Bertino, pressident dël Centro Anziani a l’ha duvertà la
rapresentassion con pòche ma ciàire paròle lasssandje peui ël palch a j’ator.
Le lus dël palch a l’han giutà a scaudé ‘ncora ‘d pì lë spetàcol ma…a l’hai ‘dcò dàit
la possibilità ‘d fé la sauna sensa paghé.
Ij Trensema a son “ansema” da vint agn, a l’han comensà soa atività fansed-ne un-a
sola ëd tre companìe teatraj ‘d tre pais divers: San Giors, Cussele e San Gioann dij
Bòsch. Chi ch’a l’ha daje ‘l posson pì fòrt a la realisassion dël progét a l’é stàit
Mario Cuffia, professor ëd matemàtica che, oltra a esse motoben vajant ant la scòla, a
l’ha sempe fàit la diferensa për soa umanità e generosità. A l’é fasse stimé da tuti coj
ch’a l’han conossulo e a l’ha lassà n’arcòrd piasos an tuti jë scolé ch’a l’han avù ‘l
boneur d’avèjlo me professor. Scolé che ancheuj a l’han tuti ‘d pì che stant’agn. Bele
che la salute an cost moment a lo compagna nen, jer a l’ha vorsù feje na gròssa
sorprèisa a la companìa, cola dë vnì a assiste a lë spetàcol. Pròpi chiel che, për deje
l’andi al progét, vint agn fa a l’era butasse ant le braje dij përsonagi pì dròlo, portand
anans ëd part grignose ch’a fasìo da pivò a tuta la comedia. Mario Cuffia jer a l’era
compagnà da soa fomna Franca e da Enzo Coria, prim ator ëstòrich dij Trensema, soe
rijade s-cëtte e rumorose a son ëstàit ij batiman pì apressià.
La vantajin-a a l’é fasse sgnora d’ator ëd minca età a comensé da Christian con 7 agn,
Alessandro con 9, Ludovica con 13, Sem con 16, Lisa con 23 e Davide con 25. La
scala a va anans con Ombretta, Giuliana, Elio, Franco, Candida e Arialdo.
La stòria a conta ‘d situassion dròle che, un pò sgrandìe dal crajon e la fantasìa
dl’autris, ancheuj, a son ròba da tuti ij di.
“Doe pacolin-e a Turin” a l’han fàit saré ‘l dòp-disné an alegrìa con n’aventura
sitadin-a ‘d na mare e ‘d na fija paisan-e ch’a së scontro con la realtà dla sità e na
madamërla con sò can. A rivo scasi a le bòte ma la saviëssa dla fija a ‘riess a rangé le
còse. La stòria, ch’a ciama ‘dcò la presensa d’un cìvich ëd sità, as dëslupa tuta ant un
giardin pùblich ëd Turin.
Giuliana, Annamaria, Eva, Giorgio, Franco e Camilla (la cagna), a l’han fàit
compagné l’ùltim quart d’ora con ëd san-e rijade.

Happy
Happy
100 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Lascia un commento

Apri WhatsApp
1
Chat con Canavesanoedintorni
Benvenuto. Inizia la chat con Canavesanoedintorni