0
0
di Vittoria Minetti
“Ij Trensema” a l’é na companìa teatral amatorial nassùa scasi na vinten-a d’agn fa për
buté ‘nsema ij tòch ch’a-i restava ‘d tre companìe.
A l’é stàit fin-a a tre agn fa, un viagi longh e piasos peui, për maleur, ël còvid a l’ha fërmà
tut ma adess, bele nen sensa antrap, a l’ha torna comensà a pisté j’ass d’un palch.
Ant j’agn andaré a l’ha përdù ij quatr pivò pì ansian ëd la companìa : Àngela Cesare
ancheuj a-i é pì nen, un brut mal a l’é portass-la via scasi ses agn fa. Chila a recitava nen, a
l’era pròpi parèj, a bastava vardela për butesse a grigné.
Mario Cuffia, professor ëd matemàtica, përson-a brava e comprensiva ch’a l’é stàit bon a
feje intré soa materia an tute le testolin-e, fin-a a le pì dure, ch’a son passà sota
soe…“grinfie”. Ancora ancheuj ij sò anlev che oramai a l’han tuti le piume grise, cand
ch’a lo ancontro, a-j fan tut pien ëd feste. Cand ch’a l’ha comensà a fé teatro a fasìa pì nen
ëscòla ma, con soa vos pàsia e soa passiensa, a-j dasìa a la companìa tuta la fiusa ch’a-i va
për ten-e ‘n pe ste realtà.
Ester Marta, la pì ansian-a ‘d tuti che, për boneur a l’é ‘ncora viva, a parla l’inglèis tant me
‘l piemontèis e l’italian e, pròpi për sfruté sò “poliglottismo”, da la piuma ‘d Vitòria Minèt
a l’é surtije “L’ardità ‘d magna Catlin-a”.
Pierangelo Piana a l’avìa comensà da giovo con ël teatro, a l’ha vestì tuti ij ròlo, dal
giovnòt al vësco. N’artista che, con un penel an man, a piturava djë sfond da lassé ambajà
‘l pùblich. Për San Gioann, sò pais, a l’ha fabricà un teatro su misura con tant ëd tende dë
vlù ross ch’as podìa monté e dësmonté a la bsògna. Ma costì a l’é stàit jer, adess a venta
pensé a l’ancheui e al doman.
Dumìnica 29 ëd gené, apress a tanti antrap, la companìa a l’é tornà sël palch con na
comedia neuva : “Chi ch’a la veul cheuita…chi ch’a la veul cruva”, n’at ùnich ëd Vitòria
Minèt, na comedia ch’a conta ‘d n’òmo e fomna pì nen giovo che, për passé na bela Pasca,
a pijo la decision d’anvité tuti ij fieuj. Minca un a l’ha pijà soa stra, chi seulia chi dròla
che, nen sempe, a s’ancontra con la mentalità dij sò.
Lë spetàcol a dura nen pì ‘d n’ora ma a cheuj tante situassion grignose ch’a l’han fàit s-
ciopé ‘l pùblich an tanti batiman.
La companìa, oltra a ten-e da cont j’ator pì…d’età e vajant me Arialdo Milano, Candida
Boggio, Franco Tomasi Cont, Ombretta Boggio, Elio Panero e Giuliana Delaurenti, a l’é
fasse sgnora mersì a vàire giovo ch’a son angagiasse ant l’imprèisa: Alessandro Canale
Clapetto (ël pì pcit ëd tuti), Ludovica Alberto (12 agn), Giulia Algostino (14 agn), Sem
Panero (16 agn), Elisa Panero (22 agn) e Davide Sambuco (24 agn).
Për ij pì giovo l’impegn a l’é stàit pì grev përchè a l’han dovù adatesse a parlé piemontèis
ma, gavà quèich boro, a son gavass-la ‘d pì che bin.
Për saré ‘l dòp mesdì, la companìa a l’ha butà an sena “Doe pacolin-e a Turin” ch’a conta
‘d n’andàita d’un paisòt ëd campagna a Turin ëd na mare con soa fija.
A l’é ant un giardin pùblich ch’as consuma na mesa tragedia cand ch’as ancontro na
madamërla con sò can e Gioana, la mare. A sarà mal fé për la fija esse ël mediator ëd pas
antrames a le doe.
Un monsù ‘d passagi e ‘n cìvich a rendo pì ‘nteressanta la sena.
Annamaria Caffri, Gioana a l’é la mare, Giuliana Delaurenti, Roseta la fija, Franco Tomasi
Cont, ël cìvich e Luca Sambuco, ël monsù.
Dumìnica 12 ëd fërvé la companìa a réplica torna a singh ore dël dòp mesdì e, për boneur
le cadreghe a son già torna tute pien-e.
Adess ij Trensema a spero d’andré vers tante répliche con la speransa ch’a peusso avèj tute
la riussìa ëd la “prima”.
+ There are no comments
Add yours