0
0
di Vittoria Minetti
A venta ch’i comensa mia ciaciarada ciamandje scusa a n’atris, Eva Beruatto, ch’a l’é la
prima vira ch’a récita con ij Trensema. Ant l’artìcol ch’i l’hai fàit l’àutra vira i son
dësmentiame ‘d nominela bele che ant le veste dla “madamërla” con soa Camilla (la
cagna) a l’abia portà anans na part motoben grignosa për ël pùblich ma malfé për chila
përchè Camilla, anans ëd monté sël palch, a tirava me na danà rabland Eva tut andova ch’a
vorìa chila.
A part ësto preàmbul dumìnica ij Trensema a l’han replicà con un teatro torna pien e un
pùblich càud e carià ch’a l’é col ch’a cissa j’ator con le rijade e ij batiman.
Bele che la companìa a sia formà da vàire pensionà, apress a scasi tre agn ëd pàusa a l’é
nen ëstàit bel fé torna comensé ‘dcò përchè la combrìcola a l’é dventà sgnora mersì a fije e
fieuj giovo, minca un con sò impegn ëd travaj o dë scòla e a venta trové ‘l moment për
fiché un càpol ëd temp da dediché a le preuve con tuta la dificoltà d’amprende le part an
piemontèis. Ij giovo oramai a parlo tuti italian.
La stòria a l’é un turbij ‘d situassion dròle ch’a fà da specc a la vita ‘d tuti ij di e a bolversa
la pas ëd na cobia ëd na certa età che, con un disné dël di ‘d Pasca, a spera d’artrové la
serenità ‘d cand ch’a j’era tuti ij fieuj antëcà.
Nòsta companìa a travaja scasi sempe con na trama còmica ma nen sensa moral e, a-i é nen
manca ‘d dilo, la stòria a l’ha sempe un final piasos.
Bin bin agradìa a l’é stàita la vìsita d’un regista ver ch’a l’ha comentà lë spetàcol positiv
tutun dandne dij consèj për rangé quàich magagna.
+ There are no comments
Add yours