0
0
di Vittoria Minetti
Un pontel da nen manché minca ann a l’é col dël consert ëd la Filarmònica Carlo Botta.
La Filarmonica ‘d San Giòrs a nass dël 1877 mersì a ‘n grop ‘d paisan guidà dal magìster
Giusèp Gozan e a pijà ël nòm da sò sitadin pì avusà: Carlo Botta, médich, filòsof, ëstòrich e
polìtich.
Lë scond magìster a l’é stàit Gioann Erbetta che, dël 1889 a l’ha componù na marcia con ël
tìtol “A Carlo Botta” che, ancora adess, dòp pì ‘d sent agn a ven sonà an ocasion ëd le
celebrassion an onor ëd Santa Cecilia.
Dël 1915 e për quarant’agn apress, a l’é giontasse n’àutra banda, la fanfara dl’oratòri direta da
Cichin Dòrma, nassùa ‘d pì che d’àutr për compagné le sirimònie religiose.
La “Carlo Botta” a l’ha passà ‘d moment ëd gròsse dificoltà a càusa dl’emigrassion e dle
guère. Tant a l’é che tra ël 1940 e ‘l 1945 a l’é staje l’arzigh ch’a-j confischèisso jë strument
ma mersì a la pensada ‘d dontré musicant ch’a l’han ëstërmaje, a la fin ëd la guèra la
Filarmònica a l’ha podù torna comensé sùbit soa atività.
Ël magìster che ‘d pì a l’é restà ant la memòria ‘d tuti a l’é Carlo Defilippi che, për pì ‘d
quarant’agn sota a soa diression la banda a l’ha festegià jë 75 e ij 100 agn ëd fondassion. Dal
moment che ant l’istess temp a l’era stàit nominà diretor ëd le bande musicaj “Sità d’Osta” e ‘d
“Saint Vincent” për un pò ‘d temp a l’ha dovù lasseje la diression ëd la Filarmònica a sò vice:
Milio Cantel.
Ël sentenari e le neuve leve ch’a rivavo dai cors tënnù pròpi da la Filarmònica, a l’han daje un
bel posson tant che ant j’agn 70 e 80 as contava na senten-a d’anlev.
Dël 1979 ël Dino Milan a l’ha daje vita a la “Canson dël Carlevé Sangiorgèis” peui a le marce
“Irmina (la Gerbolin-a)” e la “Sangiorgin-a” ch’a ven-o sonà ancora ancheuj.
Na ricorensa ‘mportanta da nen dësmentiè a l’é stàit ël viagi a Iglesias për compagné l’intrada
da vësco ëd Monsignor Arrigo Miglio (ancheuj Cardinal Arrigo Miglio) e, sempe ‘n Sardegna
con l’union ëd la banda musical d’Àles peui ‘ncora an Umbria për pijé part al gemelagi tra San
Giòrs Canavèis e Campello sul Clitumno (Pg).
A stèmber dël 2001 a monta sla pedan-a dla Filarmònica ‘l prof. Morello, avosà obòista e
compositor che, dël 2002 ant l’ocasion dij 125 agn ëd fondassion, a-j dédica a la banda na
marcia con ël tìtol “Non per forza” ch’a l’é ‘dcò ‘l mòt ëd la Comun-a ‘d San Giòrs.
Ancora ancheuj ant le sfilate as son-o soe marce.
Dël 2007 a l’é ‘l magìster Domenico Mensa a pijé la bachëtta dandje n’impronta pòp-ròch al
repertòri. Na sernia motoben aprëssià tant da la gent me dai musicant.
Dël 2011, Elena Datta, na cantante con na tuba da stupì a comensa a pijé part ai consert e
apress a-i riva ‘dcò la soprano Mary Ollearo con na vos da fé vnì la pel granà.
Ël magìster d’ancheuj a l’é Ivan Pagnone, sensa parpajon e giaca dle coe ma ch’a l’ha la
mùsica ‘ndrinta a chiel. Un giovo bel da vëdde, ch’a la viv con ël còrp e con ël cheur
giontandje un pcit pëssion ëd bon-a matarià ch’a n’ariess a trasmëtte tant ai sò mùsich me al
pùplich.
+ There are no comments
Add yours