Ij Trensema a San Gioann/ San Giovanni Canavese (in lingua piemontese)
Tempo di lettura:2 Minuti, 8 Secondi
di Vittoria Minetti
Bele ch’a tirèissa giù d’eva a sigilin, la gent a l’é nen pijasse por e a l’ha ‘mpinì ‘l
salon ëd la Società ‘d San Gioann për vëdde la comedia dij Trensema “Chi ch’a la
veul cheuita e chi ch’a la veul cruva” e la farsa “Doe pacolin-e a Turin”.
A neuv e ‘n quart le cadreghe a j’ero già tute ocupà e tante përson-e a son ëstàite an
pe.
A venta dì che ij sòlit volontari a l’han cambiaje facia a l’ambient con ël montagi dla
strutura ideà e construìa da Pierangelo Piana nen mach pitor ma “artista a tutto
tondo” coma ch’as dirìa an italian.
Ël palch, fàit ëd tàule ‘d bòsch pogià dzòra a ‘d cavalèt ëd fer motoben robust a l’é
àut col tant ch’a basta për ch’a së s-ciàira fin-a d’ant l’ùltima fila.
La part dëdnans a l’é un “proscenio” piturà con l’ansëgna dla “Filodrammatica
Sangiovannese”, companìa teatral stòrica dël pais.
Dë dsà e dë dlà dël palch le doe overture lateraj a përmëtto a j’ator ed monté e calé
d’an sena, tant da na part me da l’àutra, travers doe scalëtte ‘d bòsch sensa esse vist
dal pùblich. Pierangelo a l’ha studiaje pròpi tute.
Lòn ch’a rend peui pì sgnor ël tut a l’é ël tendon dë vlù ross bordà d’òr ch’a l’avìa
cusì Àngela, sartòira, atris ch’a l’ha pistà sto palch tante e tante vire fin-a a quèich
agn fa, cand che Nosgnor a l’ha decidù ‘d fela rampié ‘n Paradis.
Pierangelo Piana a l’ha ij sò agn…a venta nen dì vàire e ‘n caraterin un pò ombros, a
l’é andaje col pòch e col pro a convincc-lo a ocupé ‘l pòst an prima fila che la
companìa a l’avìa guernaje për feje la sorprèisa d’un cadò. Ëdcò chiel a l’ha arvesti
tanti ròlo come ator, prima ant la Filodrammatica e peui ant ij Trensema, e la
companìa a l’ha pensà d’argaleje na cheuita ‘nquadrà ‘d soe fòto ant ij tanti përsonagi
ampërsonà.
Dòpo la pandemìa a l’ha pijà la decision ëd pianté lì ma la companìa a l’ha vorsù dije
mersì për ij vint’agn ëd teatro fàit ansema.
Na vòlta finì lë spetàcol, la companìa a l’ha podù bërlichesse ij barbis con tute le
galuparìe che le fomne a l’avìo potagià.
Strach ma tant sodisfàit, j’ator a l’ha sarà ‘l sipari dla giornà.
Happy
100 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
