Ij Trensema…un për un (in lingua piemontese)
Tempo di lettura:2 Minuti, 42 Secondi
di Vittoria Minetti
Apress a la “prima” fàita ant ël teatro Belloc ëd San Giòrs, ij Trensema a l’han pijà
l’andi e a l’han comensà a porté an sena sò spetàcol ant ij pais ëd j’anviron…e nen
mach.
Apress a j’agn ëd ferma a càusa dël Covid la companìa a l’é fasse pì sgnora con
dj’ator giovo e bej ch’iv fas conòsse:
Da snistra ant la fòto j’ator ch’a l’han butà an sena “Chi ch’a la veul cheuita …chi
ch’a la veul cruva”: Alessandro, Lisa, Sem, Franco, Elio, Arialdo, Candida,
Ombretta, Giuliana, Davide, Ludovica e Cristian.
Sta companìa, “Filodrammatica Sangiorgese” a l’é ‘n pé dal 1986 con dj’àutri ator, as
capiss ma ‘l prim pivò, Arialdo, a j’era e a j’é ‘ncora. A marcia dzora a le pianà ‘d sò
pare Dino che, ansema a Giovanni, Luciana e Angela a son andàit a fé grigné
Nosgnor e ij sant an Paradis.
An mes a tanti antrap la companìa a l’é sempe andàita anans e a l’é dventà “Ij
Trensema” përchè j’ator a rivavo da tre pais divers.
Alessandro e Cristian, ij doi pì pcit a son frej, nòste promësse për ël doman.
Lisa a l’ha comensà con nojàutri cand ch’a l’avìa mach ses agn e Sem, sò frel, setà
dzora a lë spassëggin a vnisìa dapress a nòste trasferte possà da la mare peui a l’ha
comensà a recité an farse scrite espress për chiel fin-a a rivé al di d’ancheuj con
sëddes agn e na part motoben amportanta.
Franco a l’é n’ator tant ësfrutà përchè a coata bin qualsëssìa ròlo, a récita për “lo
Zodiaco” e a l’ha portà anans ël përsonagi dël banché Carlo Ogliani – Un banchiere
canavesano alla corte del Re – di Eraldo Enrietti.
Elio, na sorprèisa, na bela sorprèisa, portà ‘d pèis sël palch già da quèich agn për la
mancansa ‘d n’ator, a l’é rivelasse na sernia ‘mbinà.
Arialdo a l’é Arialdo, ëd chiel as peul mach dì ‘d bin e a basterìa nen un lìber spess
tant me ‘n vocabolari për conté tut ëd chiel.
Candida a l’ha sempe giutà daré dle quinte peui ciapà ‘n mes minca vòta ch’a j’era
manca ‘d coaté na part curta, nopà sta vòlta, ansema a Arialdo, a l’é un dij përsonagi
pì ‘mportant ëd la comedia.
Ombretta, ëdcò chila presensa stòrica dla companìa, përsona “poliedrica” ch’a fà tant
e tut bin oltra a fé nasse ‘d masnà, a l’é na levatris. A dev fé ‘d sàut mortaj për
dësgavignesse antrames a travaj, famija, spòrt e teatro ma precisa e pontual, chila a-i
é sempe.
Giuliana e Davide, mare e fieul, tuti e doi a l’han già un passà ‘d recitassion con “Ij
Tirapere” ‘d Ber. Tant l’un-a me l’àutr a l’han portà anans ëd part dròle e grignose
ma bastansa malfé da realisé.
Ludovica a l’ha tërdes agn, ansema a Alessandro e a Cristian a fà part ëd dle
promësse ëd nòstr doman, a pista ‘l palch da cand ch’a l’avìa mach quatr agn e a l’era
‘ncora nen bon-a lese ma ‘l teatro piemontèis a l’ha sempe ‘nciarmala.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
